Ü.Hacıbəyli adına BMA-nın “Şifahi ənənəli Azərbaycan professional musiqisi və onun yeni istiqamətlərinin tədqiqi: Orqanologiya və akustika” elmi tədqiqat laboratoriyasının aparıcı elmi işçisi, sənətşünaslıq üzrə fəlsəfə doktoru, dosent  Ruqiyyə Süleymanovanın “Azərbaycan bəstəkarlarının kino musiqisi” adlı mövzusunda elmi seminarı keçirildi.

R.Süleymanova çıxışının əvvəlində Azərbaycanda kino sənətinin yaranmasında, inkişafında , tanınmasında və  kinofilmlərdə bədii obrazların daxili aləmlərinin açılmasında, filmlərdə baş verən hadisələrin dərinliyinə nüfuz edilməsində, qəhrəmanların psixoloji vəziyyətlərinin, düşüncə və psixologiyalarının tamaşaçıya çatdırılmasında musiqinin tutduğu mövqe haqqında ətraflı məlumat verdi.

Məruzəçi eyni zamanda , XIX əsrin sonunda Fransada yaranan dünya kinosunun 1898 – ci ildə Azərbaycana gətirilməsi , Anton Mişonun şəhər mövzularında bir neçə kino süjetləri çəkib avqustun 2 – də onları tamaşaçılara nümayiş etdirilməsi və həmin gün ölkə başçısının sərəncamı ilə kino işçilərinin peçə bayramı -Azərbaycan kinosu günü kimi qeyd olunması haqqında söz açdı.

Həmçinin Azərçaycanın görkəmli bəstəkarlarının yaradıcılığında önəmli yer tutan kinofilmlərə yazılmış musiqi əsərlərinin adlarını sadaladı. Fərqli – fərqli məzmun və üslubda çəkilmiş filmlərə möhtəşəm kompozisiyalar bəstələmiş Üzeyir Hacıbəyli , Müslüm Maqomayev , Qara Qarayev, Fikrət Əmirov, Niyazi ,Arif Məlikov , Xəyyam Mirzəzadə , Cahangir Cahangirov , Vasif Adıgözəlov , Rauf Hacıyev , Emin Sabitoğlu və başqalarının yaradıcılıqlarında önəmli yer tutan və yaratdıqları nadir sənət nümunələrinin melodiyasının özünəməxsus , orijinal üslublarından bəhs etdi. Filmlərə yazılmış müxtəlif  mövzulu mahnıların sonradan müstəqil mahnı hüququ qazanaraq fərdi ifa edilməsi haqqında məruzə etdi.

R.Süleymanova çıxışının davamında Azərbaycan kinosunun gözəl mahnı ənənələrinin, görkəmli bəstəkar Tofiq Quliyevin yaradıcılığında böyük inkişaf dövrü keçdiyini xüsusi olaraq vurğuladı.  Bəstəkarın filmlərə yazılmış musiqi əsərlərinin adlarını sadaladı.”Sən niyə susursan “ , “Şir evdən getdi “ ,”Qaynana “ , “Görüş “ , “Qızmar günəş altında” , “O qızı tapın” , “Ögey ana” , “Bəxtiyar” , “Telefonçu qız” , “Onu bağışlamaq olarmı ? ” və s.

Məruzəçi xüsusi olaraq Qara Qarayevin “Bir məhəlləli iki oğlan” (1957) , Fikrət Əmirovun “Səhər” (1960) ,Tofiq Quliyevin “Görüş”(1955) ,”Bəxtiyar”(1955), “Ögey ana” 1958) , “Telefonçu qız “(1962) , “Onu bağışlamaq olarmı?”(1959) , Rauf Hacıyevin “Romeo mənim qonşumdur”(1963) kinofilmlərinə yazılmış musiqi  haqqında məlumat verdi.

Seminarda eyni zamanda adları çəkilən filmlərin bir qismi ilə bağlı qısa fraqmentlər nümayiş etdirildi.

Seminarın sonun Ü.Hacıbəyli adına BMA-nın elm və yaradıcılıq işləri üzrə prorektoru Əməkdar incəsənət xadimi, fəlsəfə elmləri doktoru, professor Gülnaz Abdullazadə; elmi–tədqiqat laboratoriyasının müdiri, sənətşünaslıq üzrə fəlsəfə doktoru, dosent Nuridə  İsmayılzadə; Əməkdar incəsənət xadimi, sənətşünaslıq üzrə fəlsəfə doktoru, professor Arif Əsədullayev; böyük elmi işçi Zeynal İsayev və elmi tədqiqat laboratoriyasının digər əməkdaşları çıxış edib, seminar haqqında dəyərli fikirləri ilə bölüşdülər.