Bakı Musiqi Akademiyasında Xalq artisti Rauf Atakişiyevə həsr olunmuş elmi-ifaçılıq konfransı

Üzeyir Hacıbəyli adına Bakı Musiqi Akademiyasında 14 noyabr 2025-ci ildə keçirilən “Azərbaycanın musiqi sənətinin inkişafında Xalq artisti, professor Rauf Atakişiyevin əvəzsiz irsi” mövzusundakı elmi-ifaçılıq respublika konfransı, təkcə yubiley tədbiri deyil, milli musiqi mədəniyyətinin dərin qatlarına enən, böyük sənətkarın irsinin yenidən kəşf edildiyi əlamətdar bir görüş kimi yadda qaldı.

Konfransdan öncə Rauf Atakişiyevin uzun illər tədris etdiyi sinif otağında  lövhənin açılışı oldu. Professor-müəllim heyəti R.Atakişiyevin xatirə şəkillərindən ibarət sinif otağında onunla bağlı təəssüratlarını bölüşdülər.

Qeyd edək ki, konfransda qonaq qismində görkəmli musiqiçi, dünya şöhrətli violin ustası və dirijor Dmitri Sitkovetski iştirak etmişdir. 

Dimitri Siktovetski və Azərbaycanın Xalq artisti, BMA-nın rektoru, professor Fərhad Bədəlbəyli Rauf Atakişiyevin xatirəsini hörmətlə yad edərək onunla bağlı xatirələrini bölüşdülər. Həmçinin, birlikdə səhnədə yer alıb, Dimitri Şostakoviçin 4 prelüdünü ifa edərək, görkəmli musiqiçiyə ehtiramlarını bildirdilər.

Konfrans Üzeyir Hacıbəylinin 140 illiyinə həsr olunmuş musiqi festivalı çərçivəsində təşkil olunmuş və layihənin rəhbəri — Azərbaycanın Xalq artisti, BMA-nın rektoru, professor Fərhad Bədəlbəyli olmuşdur. Sənətkarın şəxsiyyəti və fəaliyyəti təkcə tarixi faktlarla deyil, həm də tələbə və müəllimlərin canlı çıxışlarında, elmi məruzələrdə və təqdim olunan arxiv görüntülərində bütün çalarları ilə açıldı.

Konfransı giriş sözü ilə açan “Metodika və xüsusi pedaqoji hazırlıq” kafedrasının müdiri, professor Elnarə Məmmədova, Rauf Atakişiyevin Azərbaycan musiqi sənətində oynadığı misilsiz rolu xüsusi vurğuladı. Onun sözlərinə görə, Xalq artistinin fəaliyyəti tək bir sahə ilə məhdudlaşmır: vokal və fortepiano ifaçılığı, pedaqogika, tələbələrlə yaradıcı iş, repertuar seçimi və ifa estetikasında gətirdiyi yeniliklər bütöv bir dövrün musiqi düşüncəsini formalaşdırmışdır.

Atakişiyev həm ifaçı kimi səhnənin parlaq siması, həm də pedaqoq kimi onlarla sənətkarın yoluna işıq salan bir müəllim idi. Məhz bu çoxşaxəli fəaliyyət konfransın əsas ideya xəttini təşkil edirdi.

Konfrans boyunca tanınmış alim və pedaqoqlar Rauf Atakişiyevin irsini müxtəlif aspektlərdən təhlil etdilər.

Professor Könül Nəsirova sənətkarın vokal məktəbinin incəliklərindən bəhs edərək onun nəfəs texnikası, diksiya və emosional yük balansında yaratdığı özünəməxsus sistemi təhlil etdi.

Professor Zümrüd Dadaşzadə Atakişiyev yaradıcılığını “zamanın interyerində” təqdim edərək dövrün mədəni mənzərəsində onun yerinə xüsusi vurğu etdi.

BMA-nın dosenti Alyona İnyakina isə Atakişiyevin fortepiano ifaçılığının texniki və üslubi xüsusiyyətlərini geniş şəkildə şərh etdi.

Dosent Natiq Rzazadə pedaqoji prinsiplərindən danışaraq Atakişiyevin tələbələrə münasibətində yüksək tələbkarlığa və incə psixoloji yanaşmaya diqqət çəkdi.

ADMİU tələbəsi Gülbadam Bəşirova böyük sənətkarın gənc musiqiçilər üçün rol model kimi əhəmiyyətini öz tədqiqatında əks etdirdi.

BMA-nın baş müəllimi Lalə Atakişiyeva isə “Atam haqqında xatirələr” mövzusunda çıxışı ilə tədbirə bədii-sentimental çalar qatdı — Atakişiyevi həm böyük sənətkar, həm də ailə bağları çox güclü olan bir insan kimi təqdim etdi.

Konfransın mühüm hissələrindən biri təqdim olunan ifalar oldu.

Səhnədə Azərbaycanın Xalq artistləri — Fərhad Bədəlbəyli, Ülviyyə Hacıbəyli, gənc ifaçılar Mahir Tağızadə, Altun Süleymanov və digər musiqiçilər çıxış edərək Atakişiyevin davamçısı olduqlarını sənətin dili ilə göstərdilər. S.Raxmaninovun romansları və Şopenin Polonezi kimi əsərlər tədbirə xüsusi emosional dərinlik verdi.

Xalq artistinin müxtəlif illərə aid arxiv video-yazılarının nümayişi isə tədbiri unikal edən digər məqam idi: dinləyicilər sənətkarın səsini, ifa texnikasını və səhnə xarizmasını bir daha duymaq imkanı qazandılar.

Konfransın sonunda BMA-nın “Musiqi müəllimliyi” ixtisası üzrə II kurs tələbələri professor Rauf Atakişiyevin görkəmli musiqiçilərin xatirələrində necə anıldığını təqdim etdilər. Bu çıxışlar, sənətkarın gələcək nəsillərin yaddaşında xüsusi yer tutduğunu göstərirdi.

Beləliklə, tədbir təkcə elmi forum deyil, ustad sənətkarla səmimi görüş, onun irsinə kollektiv ehtiram nümunəsi oldu.

 Rauf Atakişiyevin yaradıcılığı Azərbaycan musiqisinin yalnız keçmişini deyil, həm də bu gününü və gələcəyini müəyyənləşdirir. Bakı Musiqi Akademiyasında keçirilən bu konfrans onun irsinin nə qədər canlı, təsirli və çoxşaxəli olduğunu bir daha göstərdi.

Sənətkarın yaratdığı məktəb bu gün də formalaşır, sevilir və yeni ifaçı nəslinin düşüncəsini formalaşdırmağa davam edir.