“Zirvədə bir ömür” – sənətin zirvəsinə həsr olunan unudulmaz axşam

Azərbaycanın Xalq artisti, professor Xuraman Qasımovanın yubileyinə həsr olunmuş bu möhtəşəm konsert təkcə bir yubiley tədbiri deyil, həm də Azərbaycan vokal sənətinin zəngin ənənələrinə ehtiramın ifadəsi idi.

Səhnədə Xuraman Qasımovanın yetirmələri, tanınmış ifaçılar və Bakı Musiqi Akademiyasının Caz ansamblı çıxış edərək müxtəlif musiqi janrlarını bir konsertdə bir araya gətirdilər. Fortepiano, tar, zərb, bas və saksofonun müşayiəti ilə təqdim olunan proqram klassik vokal sənəti ilə caz elementlərinin vəhdətini nümayiş etdirdi.

Bu gecə bir daha sübut etdi ki, əsl müəllimin ən böyük əsəri onun yetişdirdiyi tələbələridir. Xuraman Qasımovanın sənət yolu isə Azərbaycan musiqi mədəniyyətində zirvədə qalan bir ömrün parlaq nümunəsidir.

Qeyd edək ki, konsertin bədii rəhbəri BMA-nın “Solo oxuma və opera hazırlığı” kafedrasının baş müəllimi Dmitriy Babayev olmuşdur. Bu da yubiley gecəsinə xüsusi mənəvi dəyər və zəngin sənət ənənəsinin davamlılığı simvolunu qazandırmışdır.