2026-cı il 20-21 sentyabr tarixlərində  Üzeyir Hacıbəyli adına Bakı Musiqi Akademiyasının Böyük Zalında “Sound of the Land of Fire Music Competition” layihəsinin qaliblərinin konserti keçirildi.

Azərbaycan Respublikası Mədəniyyət Nazirliyinin dəstəyilə Üzeyir Hacıbəyli adına Bakı Musiqi Akademiyası və Vyanadakı Azərbaycan Mədəniyyət Mərkəzinin birgə təşkilatçılığı ilə baş tutan konsert XVIII Üzeyir Hacıbəyli Beynəlxalq Musiqi Festivalı çərçivəsində reallaşıb. 

Öncə Xalq artisti, Bakı Musiqi Akademiyasının Beynəlxalq əlaqələr və sosial məsələlər üzrə prorektoru, professor Yeganə Axundova tamaşaçıları salamlayaraq, qonaq musiqiçiləri  auditoriyaya təqdim edib, tədbiri açıq elan etdi.

Konsertdə beynəlxalq müsabiqənin qalibləri — Qazaxıstan əsilli pianoçu Tomiris Bekturova və Koreya Respublikasından pianoçu Eunseon Ahn,  21 sentyabr tarixində isə Naoe Sasaki,  Nanase Kuroki, Daniel Boura çıxış etdilər.

Konsert proqramında V.A.Motsart, F.Şopen, R.Şuman, F.List, S.Raxmaninov, D.Skarlatti, K.Debüssi, Moris Ravel, B.Smetana, A.Skryabin, həmçinin görkəmli Azərbaycan bəstəkarları-Q.Qarayev, T.Quliyev, A.Abbasov, C.Hacıyevin əsərləri dinləyicilərə təqdim olundu.

Müsabiqənin əsas şərtlərindən biri Azərbaycan bəstəkarlarının əsərlərini konsert proqramına daxil etmək olmuşdur.

Qeyd edək ki, “Sound of the Land of Fire Music Competition” layihəsinin finalını təşkil edən Azərbaycanda Vyana Mədəniyyət Mərkəzinin rəhbəri Leyla Qasımova qonaq qismində tədbirdə iştirak etmişdir.

Bu konsert yalnız istedadlı gənc pianoçuların yaradıcılığının təqdimatı deyil, həm də Azərbaycanın beynəlxalq musiqi mühitində mühüm mədəniyyət platformalarından biri kimi rolunu nümayiş etdirən tədbirlərdən biri oldu.

Musiqi sərhəd tanımır — o, ölkələri, mədəniyyətləri və insanları birləşdirən universal dildir. 

3

4

1

6

2

8

5

7