• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    17 noyabr 2026-cı il 

    Gülarə Əliyevanin əziz xatirəsinə həsr olunmuş möhtəşəm xatirə gecəsi keçirilib

    17 noyabr 2026-cı il tarixində Opera Studiyasında Əməkdar İncəsənət Xadimi, görkəmli bəstəkar, Azərbaycan musiqi mədəniyyətinin parlaq nümayəndəsi, “Dan Ulduzu” instrumental ansamblının yaradıcısı Gülarə Əliyevanın əziz xatirəsinə həsr olunmuş möhtəşəm xatirə gecəsi keçirilib.

    Qərbi Azərbaycan İcmasının Qadınlar Şurası və Üzeyir Hacıbəyli adına Bakı Musiqi Akademiyasının birgə təşkilatçılığı, AzTV-nin informasiya dəstəyi ilə baş tutan tədbir görkəmli sənətkarın zəngin yaradıcılıq irsinə, Azərbaycan musiqi mədəniyyətinə verdiyi töhfələrə və əziz xatirəsinə ehtiramın ifadəsinə çevrilib.

    Millət vəkili, Qərbi Azərbaycan İcmasının Qadınlar Şurasının sədri Məlahət İbrahimqızının moderatorluğu ilə keçirilən gecənin rəsmi hissəsində Gülarə Əliyevanın həyat və yaradıcılığına həsr edilmiş “İstiqlal Nəğməli Dan Ulduzu” adlı video-film təqdim olunub.

    Tədbirdə Xalq artisti, Bakı Musiqi Akademiyasının rektoru, professor Fərhad Bədəlbəyli, millət vəkili Hicran Hüseynova, Milli Məclisin Mədəniyyət Komitəsinin sədr müavini Günay Əfəndiyeva, ADPU-nun prorektoru, professor Mahirə Hüseynova və Azərbaycan Respublikasının mədəniyyət nazirinin müavini Səadət Yusifova çıxış edərək görkəmli bəstəkarın Azərbaycan musiqi sənətindəki müstəsna xidmətlərindən, milli musiqi irsimizin inkişafındakı rolundan və onun sənət dünyasının əbədiyaşarlığından bəhs ediblər.

    Gecənin bədii hissəsində Gülarə Əliyeva adına “Dan Ulduzu” instrumental ansamblının ifasında təqdim olunan konsert proqramı tamaşaçılara unudulmaz musiqi anları yaşadıb.

    Bu möhtəşəm gecə bir daha sübut etdi ki, sənətkarların fiziki yoxluğu onların yaratdıqları əsərlərin ömrünə son qoymur. Gülarə Əliyevanın musiqisi, sənətə bəxş etdiyi incilər və milli mədəniyyətimizdə qoyduğu iz daim yaşayacaq!

    Gülarə Əliyevanın əziz xatirəsi Azərbaycan musiqi tarixində hər zaman ehtiramla yad ediləcək.