Oktyabrın 20-də Bakı Musiqi Akademiyasının Musiqi tarixi kafedrasının növbəti iclası keçirilib. İclasın gündəliyində tədris və elmi fəaliyyətlə bağlı müxtəlif məsələlər yer alıb.

Kafedra müdiri Zümrüd Dadaşzadə ümumakademiya çərçivəsində keçirilən monitorinqin reytinq cədvəlində yüksək nəticələr əldə etmiş bütün müəllimləri, o cümlədən mükafatla qeyd olunmuş İnna Pazıçeva, Kəmalə Ələsgərli, Minaxanım Babayevanı səmimi qəlbdən təbrik edib, hamıya yeni nailiyyətlər arzulayıb.

İclasda bakalavr buraxılış işlərinin və magistr dissertasiyalarının mövzuları müzakirə edilərək təsdiqlənib. Həmçinin professor İnna Pazıçevanın hazırladığı “Musiqinin tədqiqat metodologiyası” fənni üzrə tədris proqramı ətrafında fikir mübadiləsi aparılıb.

İclasın ikinci hissəsində doktorant Lalə Qurbanovanın sənətşünaslıq üzrə fəlsəfə doktoru elmi dərəcəsi almaq üçün təqdim etdiyi “Fransız impressionizminin ifaçılıq xüsusiyyətləri Azərbaycan pianoçularının konsert ifasında” mövzusunda dissertasiyasının ilkin müzakirəsi keçirilib.

Rəyçilər Könül Nəsirova, Ayanda Adilova və Minaxanım Babayeva, eləcə də yekun sözlə çıxış edən Z. Dadaşzadə tədqiqatın məziyyətləri ilə yanaşı, nöqsanlarına da nəzər yetirib, işin redaktəyə ehtiyacı olduğunu bildiriblər. Dissertasiyanın qeyd olunan irad və tövsiyələr nəzərə alınmaqla redaktə edildikdən sonra növbəti mərhələyə buraxılması barədə qərar qəbul olunub.