Qırğızıstanın Çolpon-Ata şəhərində VI Ümumdünya Köçəri Oyunları  festivalında bir çox ölkələrin nümayəndələri bir araya gəlib. Festival çərçivəsində 300-ə yaxın fərqli janrları əhatələyən müsabiqələr keçirilib.

Azərbaycan təmsilçiləri də ölkəmizi yüksək səviyyədə təmsil ediblər. Keçirilən müsabiqələr arasında “Köçmən ulduzları” beynəlxalq vokal müsabiqəsi xüsusilə seçilib. Amerika, İsveç, Rusiya və digər ölkələrin təmsilçiləri arasında Azərbaycanı Ü.Hacıbəyli adına Bakı Musiqi Akademiyasının “Solo oxuma və opera hazırlığı” kafedrasının IV kurs tələbəsi, müsabiqələr laureatı Pərvanə Nizam qızı Soltanova təmsil edib. Müsabiqə şərtlərinə əsasən iştirakçılar mütləq şəkildə Qırğızıstan bəstəkarlarının musiqi nümunələrinə müraciət etməli idilər. Pərvanə Soltanova akademik vokalla estrada vokalı birlikdə özündə tərənnüm edən krossover janrında əsərə müraciət edərək iştirakçılar arasında seçilmiş və 2-ci yerə layiq görülmüşdür. Bu Azərbaycan vokal ifaçılıq məktəbinin uğurudur. Qeyd edilməlidir ki, Pərvanə Soltanova Azərbaycan Respublikasının Əməkdar artisti, sənətşünaslıq üzrə fəlsəfə doktoru, Ü.Hacıbəyli adına BMA-nın Solo oxuma və opera hazırlığı kafedrasının baş müəllimi İlham Nəzərovun sinfində təhsil alır. Təmsilçimizə yaradıcılıq fəaliyyətində uğurlar arzulayırıq.