2026-cı il 5-9 oktyabr tarixlərində Müstəqil Dövlətlər Birliyinin iştirakçısı olan dövlətlərin XX Gənclər Delfin Oyunları Tacikistanın Düşənbə şəhərində keçirildi.

Azərbaycan Respublikası Gənclər və İdman Nazirliyinin dəstəyilə keçirilən müsabiqədə Üzeyir Hacıbəyli adına Bakı Musiqi Akademiyasının  “Nəfəs və zərb” alətləri kafedrasının tələbəsi Şəmistan Əliyev (müəllim: Xalq artisti Şükür Səmədov) uğurla çıxış edib, l yeri qazanaraq,qızıl medala layiq görülmüşdür.

O, “Nəfəs və zərb” alətləri üzrə Azərbaycanı təmsil edən yeganə iştirakçı olmuşdur. 

Qeyd edək ki, Azərbaycan Respublikasının Əməkdar artisti, BMA-nın dosenti Əziz Qarayusifli  münsiflər heyətinin sədri olmuşdur.

Yarışlardan sonra Opera və balet teatrında möhtəşəm qala konserti keçirildi.Konsertdə  Şəmistan Əliyev “Çahargah” rapsodiyasını məharətlə ifa edərək, ölkəmizi yüksək səviyyədə təmsil etmişdir. Onun parlaq ifası tamaşaçılar tərəfindən gurultulu alqışlarla qarşılandı. 

Yarışlar çərçivəsində ustad dərslər də təşkil olunmuşdur. Əziz Qarayusifli tacik məktəblilər üçün ustad dərsləri keçərək, öz bilik və bacarıqlarını məktəbli musiqiçilərlə bölüşmüşdür.

Qeyd edək ki, yarışların layihə koordinatoru Ofeliya Sultanova yarışlar çərçivəsində keçirilən konfransda iştirak etmişdir. 

Tələbələrlə iş sektorunun aparıcı məsləhətçisi isə Əli İsgəndərli olmuşdur.

Parlaq qələbə münasibətilə tələbəmiz Şəmistan Əliyevi təbrik edir, uğurlar arzulayırıq!