6 noyabr tarixində Bakı Musiqi Akademiyasında keçirilən növbəti ustad dərsi təkcə festival proqramının bir bəndi deyil, həm də tələbələrin ifa mədəniyyətinin inkişafında mühüm mərhələlərdən biri kimi yadda qaldı.

Baku International Arts Festival-a dəvət olunan dünya səviyyəli ifaçıların BMA tələbələri ilə birbaşa ünsiyyəti, onların ifasını dinləməsi, hər bir frazanın üzərində canlı işləməsi – təhsil prosesində nadir rast gəlinən, yüksək səviyyəli professional toxunuş idi.

Bu ustad dərsinin əsas qonaqları – skripkaçı Liana Qurcia (violin), Federico Hood (viola), Kati Raitinen (cello) və Alf Moser (double bass), həmçinin ustad dərsə rəhbərlik edən məşhur skripka ifaçısı və dirijor Dimitriy Sitkovetski – tələbələrin sənətə yanaşmasını daha incə, daha detala hesablanmış bir yanaşmaya yönəltdilər. Onların hər biri müxtəlif Avropa məktəblərinin estetik standartlarını da özü ilə gətirmişdi və bu müxtəliflik tələbələrin düşüncə çevikliyinə güclü təsir bağışladı.

Qeyd edək ki, tədbirin təşkilatçısı Xalq artisti, BMA-nın Beynəlxalq əlaqələr və sosial məsələlər üzrə prorektoru, professor Yeganə Axundovadır. 

Ustad dərsdə BMA-nın Tədris İşləri üzrə prorektoru, professor Nərminə Quliyeva və  “İfaçılıq” fakültəsinin dekanı, professor Nəzmiyyə Abbaszadə  iştirak etmişlər. 

Proqramda tələbələr klassiklərdən Paqanini, Venyavski, Brams, Hofmayster, Stamits, Popper və Goens kimi bəstəkarların mürəkkəb, texniki və musiqi baxımından tələbkar olan nümunələrini səsləndirdilər. Bu repertuar seçimi gənc ifaçıların potensialının yüksək olduğunu göstərməklə yanaşı, onların böyük səhnə perspektivləri haqqında da fikir formalaşdırdı.

Ustad dərsinin ən dəyərli cəhətlərindən biri də müzakirə mədəniyyəti idi: tələbələr öz ifalarından sonra suallar verdilər, müşahidələrini paylaşdılar və qonaq musiqiçilərin hər bir detalı incəliklə analiz etməsi ilə həm nəzəri, həm praktiki baxımdan yeni biliklər qazandılar.

Bütün bunlar Baku International Arts Festival-ın təkcə konsertlərdən ibarət olmadığını, həm də bilik mübadiləsi platforması, yaradıcı enerji dairəsi, yeni musiqi əlaqələrinin yaranma məkanı olduğunu bir daha göstərdi. Bu cür tədbirlər BMA-nın dünya musiqi məkanında olan mövqeyinin möhkəmlənməsinə xidmət edir və tələbələrin peşəkar inkişafına təsir edir.