• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    16 may 2019-cu il

    “Mədəni Əlaqələrin İnkişafına Dəstək” (MƏİDİB) ictimai birliyi “Estoniyada Azərbaycan mədəniyyətinin təbliğinə həsr olunmuş konsert proqramının təşkili” layihəsini uğurla başa vurub.


    Azərbaycan Prezidenti yanında Qeyri-Hökümət Təşkilatlarına Dövlət Dəstəyi Şurasının 2019-cu il üçün nəzərdə tutulan I Qrant müsabiqəsində qalib olmuş layihə may ayında Tallin şəhərində, Estoniya Teatr və Musiqi Akademiyasının (ETMA) konsert salonunda uğurla həyata keçirilib. Qeyd edək ki, tədbirin ərsəyə gəlməsində Ü.Hacıbəyli adına Bakı Musiqi Akademiyası (BMA) və ETMA yaxından iştirak edib. Layihənin əsas məqsədi Azərbaycan musiqisini beynəlxalq arenada təbliğ etmək, istedadlı gəncləri geniş auditoriyaya tanıtmaqdan ibarət idi.
    Layihə çərçivəsində Azərbaycan və Estoniya arasında qarşılıqlı təhsil və mədəniyyət körpüsü yaradılmış və gələcək uğurlu layihələrin təməli qoyulmuşdur. Belə ki, Estoniya Konservatoriyası və Ü.Hacıbəyli adına Bakı Musiqi Akademiyası arasında eyni zamanda ETMA və MƏİDİB arasında Memorandum – “Dostluq müqaviləsi” imzalanıb.
    Layihə çərçivəsində Ü.Hacıbəyli adına Bakı Musiqi Akademiyasının tələbə və müəllim heyəti - BMA-nın Beynəlxalq Əlaqələr və Tərbiyə işləri üzrə prorektoru, xalq artisti Yeganə Axundova (piano), MƏİDİB sədri, BMA-nın doktorantı və əməkdaşı İlahə İsrafilova (bəstəkar), beynəlxalq müsabiqə laureatları- Ümidə Abbasova (skripka), Fəqan Həsənli (piano), Atabəy İsmayılov (tar), ETMA-nın prorektoru Henry David Varema ilə bir səhnəni bölüşərək maraqlı konsert proqramı ilə çıxış ediblər. Konsert proqramında Azərbaycan, Avropa həmçinin Estoniya bəstəkarları - R.Şuman, İ.Brams, Q.Qarayev, S.Raxmaninov, Ü.Hacıbəyli, A. Lemba, İlahə İsrafilova, V.Adıgözəlov, F.Əmirov, Fərhad Bədəlbəylinin əsərləri səsləndirilib.
    Səslənən əsərlərlər xüsusi rəğbətlə qarşılanıb. Azərbaycan musiqisi auditoriyanın geniş marağına səbəb olub. Layihə müvəffəqiyyətlə başa çataraq maraqlı anlarla yadda qalıb.