• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    20 may 2025-ci il

    20 may 2025-ci il tarixində Ü.Hacıbəyli adına Bakı Musiqi Akademiyasının “Şifahi ənənəli Azərbaycan  professional musiqisi və onun yeni istiqamətlərinin tədqiqi: Orqanologiya və akustika” elmi-tədqiqat

    laboratoriyasının elmi işçisi Nazlı Mustafayevanın “Üzeyir Hacıbəylinin Naxçıvan Dövlət dram teatrında səhnələşdirilən əsərlərinə bir nəzər” mövzusunda elmi seminarı keçirilmişdir.

    Məruzəçi çıxışının əvvəlində dahi Ü. Hacıbəylinin  özünəməxsus, çoxşaxəli,  zəngin yaradıcılığı və onun Naxçıvan Dövlət Dram Teatrında səhnələşdirilən əsərləri haqqında ətraflı məlumat vermiş, müxtəlif dövrlərin afişalarını və foto şəkillərini, habelə olduqca böyük maraq kəsb edən video materiallar nümayiş etdirməklə yanaşı, xeyli sayda hələ məlum olmayan faktlar  aşkara çıxarmışdır.

    Nazlı Mustafayeva qeyd etmişdir ki, qəlbi Azərbaycanla döyünən, xalq musiqisindən və muğamlarımızdan ilham alan dahi bəstəkarın və ictimai xadimin əsərləri, librettosunun və melodiyasının gözəlliyi və zənginliyi, harmonik dilinin milli ladlara əsaslanması ilə diqqəti cəlb edir. Ü.Hacıbəylinin geniş yaradıcılıq irsinin izlərinə Naxçıvan Dövlət Dram Teatrının tarixində də rast gəlinir.  Əlamətdar haldır ki, Ü.Hacıbəylinin “Leyli və Məcnun” və “Əsli və Kərəm” operaları, “Ər və arvad” və “Arşın mal alan” musiqili komediyaları müxtəlif illərdə bu teatrın səhnəsində uğurla nümayiş olunmuşdur. Bu tamaşalarda Naxçıvan Dövlət Dram Teatrının tanınmış aktyorları S.Möhləvi, M.Mirişli, Ə.Haqverdiyev, F.Əlixanova, Z.Həmzəyeva, S.Hüseynova və başqaları müxtəlif rollar ifa edərək, maraqlı obrazları ilə yaddaşlara köçmüşlər. Təbii ki, Naxçıvan Dövlət Dram Teatrında Ü.Hacıbəylinin əsərlərinin tamaşaya qoyulması tarixini öyrənmək maraqlı, məsuliyyətli bir mərhələnin başlanğıcıdır.

      Naxçıvan Dövlət Dram Teatrının fəaliyyəti özündə Azərbaycan teatr tarixinin inkişaf xüsusiyyətlərini birləşdirir. 1883-cü ildə, Naxçıvanda ilk teatr tamaşasının nümayiş etdirilməsi ilə, bu sahədə ilk addımlar atılmışdır.

    Bəstəkar həm də  digər şəxslərdə də bu sahəyə maraq oyatmaqla teatr sahəsində repertuar zənginliyini formalaşdırırdı. XX əsrin ilk onilliklərində Ü.Hacıbəyli ilə yanaşı, qardaşları Zülfüqar və Ceyhun Hacıbəylilər də teatr tamaşalarının ərsəyə gəlməsində yaxından iştirak edirdilər. Həmin dövrdə Bakı ilə yanaşı, Gəncə, Lənkəran, eləcə də Naxçıvanda Ü.Hacıbəylinin əsərləri tamaşaya qoyulurdu.

    Seminarın sonunda elmi tədqiqat laboratoriyasının müdiri, sənətşünaslıq üzrə fəlsəfə doktoru, dosent Nuridə  İsmayılzadə məruzəçiyə  tövsiyə və məsləhətlərini vermiş, mövzunun aktuallığını qeyd edərək, gələcəkdə də bu mövzunun davam etdirilməsinin məqsədəuyğun olduğunu qeyd etmişdir.  Ümumiyyətlə, elmi seminar dinləyicilər tərəfindən rəğbətlə qarşılanmışdır.

    ”Elmi-tədqiqat laboratoriyasının

    kiçik elmi işçisi Sevda İsayeva.

    Back to Top