24 noyabr 2023-cü il tarixində Üzeyir Hacıbəyli adına Bakı Musiqi Akademiyasında dünyaşöhrətli bəstəkar Arif Məlikovun 90 illik yubileyinə həsr olunmuş konsert-sərgi keçirildi. 

Öncə Sənətşünaslıq üzrə fəlsəfə doktoru, musiqişünas Aytən İbrahimova konsert-sərginin iştirakçıları və qonaqları qarşısında salamlama nitqi ilə çıxış etdi. O, həmçinin görkəmli bəstəkarın çoxşaxəli yaradıcılığından bəhs edib, onun haqqında xoş xatirələrini tamaşaçılarla bölüşdü.

Təntənəli konsert gecəsində BMA-nın “İxtisas Fortepiano” kafedrasının baş müəllimi Zərif Kərimova (piano) və istedadlı musiqiçilər Nərgiz Əliyeva (fleyta), Ülviyyə Kazımova (piano), Renata Abubəkirovanın (violin) parlaq ifalarının fonunda qiraətçi Hüseynağa Aslanov tərəfindən  Nazim Hikmətin şeirləri oxundu. 

Konsert proqramında Arif Məlikovun “Məhəbbət əfsanəsi” baletindən violin üçün monoloq, “Rəqs”,  “Noktürn”, “İki qəlbin dastanı” baletindən “Komdenin arzuları”, Fleyta və orkestr üçün “Konsertino”, Fortepiano pyesləri - Üç vals, “Zarafat”, “Noktürn”, “Təzadlar”, “İki qəlbin dastanı” baletindən “Qızların rəqsi” əsərləri dinləyicilərə təqdim olundu. 

Sərgidə isə rəssamlar - Könül Hüseynzadə, Şəfiqə Yusupova, Turan Ataşova, Kristina Sultanovanın rəngarəng rəsm əsərləri nümayiş etdirildi. Təqdim olunan rəsm əsərlərinin bir qismi Arif Məlikovun yaradıcılığına, bəstələdiyi əsərlərə həsr olunmuşdur. 

Rəssam Şəfiqə Yusupova sərgidə həmçinin görkəmli bəstəkarın portreti olan “Ümidli baxışlar” adlı əsərini təqdim etdi.

Beləliklə, Arif Məlikovun 90 illik yubileyinə həsr olunmuş konsert-sərgi hər kəs tərəfindən böyük maraqla qarşılanaraq, bütün izləyicilərdə xoş əhval-ruhiyyənin yaranmasına səbəb oldu.