15  aprel 2025-ci il tarixində Beynəlxalq Muğam Mərkəzində “Nağıl danış mənimçün” adlı musiqi-poeziya axşamı keçirildi.

Tədbirin ideya müəlliflərindən biri, pianoçu və bəstəkar, Bakı Musiqi Akademiyasının baş müəllimi Zərif Kərimova axşamın musiqi proqramını təqdim etdi.

Tədbir aktyor və qiraətçi Hüseynağa Aslanov ilə birgə təşkil olunmuşdu. Müasir Azərbaycan şairlərinin poeziyası Zərif Kərimovanın ifasında səslənən musiqi ilə vəhdət təşkil edirdi. Axşamda klassikadan tutmuş caz və kino musiqisinə qədər müxtəlif üslubda əsərlər təqdim olundu. İlk dəfə olaraq Bakıda Rendi Nyuman, Fazıl Atakoğlu, Toyqar Işıklı, Harold Arlen, Co Hisaishi və Konstantin Meladze kimi tanınmış bəstəkarların əsərləri səsləndirildi.

Musiqiçi qonaqlar — Nərgiz Əliyeva (fleyta), Nurlana Abdullayeva (vokal), İsmayıl Zülfüqarov (tar) və Cəfər Həsənov (nağara) öz çıxışları ilə proqramı daha da zənginləşdirdilər.

Axşamı Azərbaycan Yazıçılar Birliyinin katibi İlqar Fəhmi açdı. Tədbirin sonunda Hüseynağa Aslanovun sözlərinə və Zərif Kərimovanın musiqisinə bəstələnmiş “Xatirə” adlı mahnı təqdim olundu.

Poeziya və musiqinin vəhdət təşkil etdiyi konsert gecəsi tamaşaçıların gurultulu alqış sədaları altında başa çatdı.