Bakı Musiqi Akademiyasında Musiqi Bayramı: Bakı Kamera Orkestri və “Simurq” layihəsinin ifaçılarının iştirakı ilə möhtəşəm konsert keçirildi.

Tədbirin yüksək qonaqları sırasında Heydər Əliyev Fondunun vitse-prezidenti Leyla Əliyeva, Bakı Media Mərkəzinin rəhbəri, fondun nümayəndəsi Arzu Əliyeva, Prezident Administrasiyasının Humanitar siyasət, diaspor, multikulturalizm və dini məsələlər şöbəsinin müdiri Fərəh Əliyeva, Heydər Əliyev Mərkəzinin direktoru Anar Ələkbərov, Azərbaycan Respublikasının mədəniyyət naziri Adil Kərimli, mədəniyyət nazirinin  müavini, Xalq artisti Murad Hüseynov, Azərbaycan Dövlət Filarmoniyasının direktoru və bədii rəhbəri, Xalq artisti Murad Adıgözəlzadə  iştirak edirdi.

Gecənin proqramında həm dünya, həm də Azərbaycan bəstəkarlarının seçmə əsərləri səsləndi. İfaçılar arasında müxtəlif yaş qruplarından olan istedadlı gənclər çıxış edərək, peşəkarlıq və artistik bacarıqları ilə tamaşaçıların alqışını qazandılar.

Konsert Üzeyir Hacıbəylinin “Arazbarı” əsəri ilə başlandı. Ardınca “Simurq” layihəsinin iştirakçıları — Fəxriyyə İsgəndərova, Suada Işıkkent, Nuray Əliyeva, Cəlalə Ismayılzadə, İnci Həsənli kimi istedadlı şagird və tələbələr Dmitri Kabalevski, Melody Bober, Fikrət Əmirov, İohann Sebastyan Bax, Feliks Mendelson, Friderik Şopen kimi bəstəkarların əsərlərini böyük məharətlə təqdim etdilər.

Beynəlxalq müsabiqələr laureatları olan tələbələr — Kənan Məmmədzadə (A.Məlikovdan “Komdenin arzuları”), Məhəmmədəli Paşazadə (A.Giampieri “Venesiya Karnavalı”), Aysun Mahmudzadə (F.A.Bualdye “Bolero”), Hidayət Sadıqbəyli (E.Əfrasiyabın “Parafraz”), eləcə də Tofiq Quliyevin “Sevgi valsı”nı Aysun Mahmudzadə və Rauf Məmmədzadə duet şəklində səsləndirərək gecəyə xüsusi rəng qatdılar.

Konsert boyunca səslənən hər bir ifa Azərbaycanın musiqi təhsilinin yüksək səviyyədə olduğunu və gələcəyin parlaq musiqiçilərinin yetişdiyini nümayiş etdirdi. Belə əhəmiyyətli tədbirlərin keçirilməsi gənclərə səhnə təcrübəsi qazandırmaqla yanaşı, milli və klassik musiqi irsini yeni nəslə aşılamaq baxımından da mühüm əhəmiyyət daşıyır.

Bu möhtəşəm gecə Azərbaycanın musiqi dünyasında gəncliyin səsini ucaldan, gələcəyə ümid verən bir sənət bayramı kimi yadda qaldı.

6

5

3

7

1

4

2

8