Tədbiri giriş sözü ilə açan konsertin aparıcısı — Əməkdar incəsənət xadimi, Üzeyir Hacıbəyli adına Bakı Musiqi Akademiyasının “Musiqi tarixi” kafedrasının müdiri, professor Zümrüd Dadaşzadə dinləyiciləri musiqinin dərin qatlarına aparan mənalı və zərif nitqi ilə gecəyə xüsusi ovqat bəxş etdi.

Konsertdə dünya şöhrətli pianoçu, Türkiyə Respublikasının Dövlət artisti Gülsin Onay Azərbaycanın tanınmış pianoçusu, Xalq artisti, professor Yeganə Axundova ilə eyni səhnəni bölüşərək dinləyicilərə unudulmaz musiqi ziyafəti təqdim etdilər.

Tədbirdə dirijor, Əməkdar artist Fuad İbrahimovun rəhbərliyi altında Bakı Dövlət Kamera Orkestrinin müşayiətilə solistlər klassik repertuarın incəliklərini ustalıqla təqdim etdilər.

Konsert proqramında dahi bəstəkar Wolfgang Amadeus Mozartın əsərləri səsləndirildi. Xüsusilə “Divertisment” F-dur və iki piano və orkestr üçün Konsert Es-dur əsərləri tamaşaçılar tərəfindən böyük maraq və alqışla qarşılandı.

 

Tamaşaçıların çoxsaylı istəkləri nəzərə alınaraq, ifaçılar Biss ifa edərək, İ.Bramsın “Macar rəqsi” N.5 və S.İbrahimovanın “Yenə güllər açıb” əsərlərini dinləyicilərə ərmağan etdilər.

Bu musiqi gecəsi klassik sənətin zərifliyini və canlı ifanın sehrini bir daha nümayiş etdirərək dinləyicilərin yaddaşında xüsusi iz buraxdı.