Avropa Azərbaycan Məktəbinin şagirdləri BMA-da ekskursiyada oldular

14 may 2025-ci il tarixində Avropa Azərbaycan Məktəbinin 4-cü sinif şagirdləri Bakı Musiqi Akademiyasında oldular. Ekskursiya Xalq artisti, BMA-nın Beynəlxalq Əlaqələr, Sosial Məsələlər və İctimaiyyətlə Əlaqələr üzrə prorektoru, professor Yeganə Axundovanın təşəbbüsü və təşkilatçılığı ilə həyata keçirildi. Ekskursiyanı BMA-nın “İxtisas fortepiano” kafedrasının baş müəllimi Zərif Kərimova aparmışdır.

Şagirdlər hal-hazırda PYP Exhibition layihəsinə hazırlaşırlar və layihələrinin mövzusu – musiqidir. Bu səbəbdən onların maraq dairəsinə musiqi ilə bağlı hər şey daxil idi: Bakı Musiqi Akademiyasında hansı alətlər tədris olunur, bu alətlərdə necə ifa etmək olar, onların quruluşu necədir, musiqi təhsili neçə il davam edir və s.

Ekskursiya zamanı uşaqlar fortepiano, skripka, orqan, klarnet, bəstəkarlıq siniflərində, həmçinin trionun məşqində iştirak etdilər. Onlara  “İfaçılıq” fakültəsinin dekanı, Əməkdar incəsənət xadimi, professor Nəzmiyyə Abbaszadə, Əməkdar müəllim, Fortepiano fakültəsinin dekanı, professor Nəzakət Rimazi, professor Elnarə Kəbirlinskaya, dosent Arzu Məmmədova, dosent Jalə Cəfərova və digər müəllimlər tərəfindən ixtisaslarının xüsusiyyətləri, musiqi alətləri və musiqiçi peşəsi haqqında ətraflı məlumat verildi.

Şagirdlər böyük maraq göstərərək müxtəlif maraqlı suallar verib, müəllimlərlə fəal dialoqda oldular. Ekskursiya həm informativ, həm də əyləncəli keçərək, uşaqlar üçün yaddaqalan təcrübəyə çevrildi.