• Bütün bunlara görə Üzeyir Hacıbəyovun yaradıcılığı Azərbaycan xalqının milli sərvətidir. 

    Üzeyir Hacıbəyov şəxsiyyəti Azərbaycan xalqının iftixarı, bizim milli iftixarımızdır.

     

    Heydər Əliyev

     

  • Bəstəkarlar öz əsərlərini yaradarkən, unutmamalıdırlar ki, bizim yaradıcılığımızı xalq qiymətləndirir.

    Çunki xalq yalnız yaradıcı, yalnız bəstəkar deyildir; xalq eyni zamanda misilsiz tənqidçi və musiqi

    əsərlərinin ən yaxşı «istehlakçısıdır», xalq musiqi əsərlərinə diqqətlə yanaşır, yaxşını pisdən seçir.

     

    Üzeyir Hacıbəyli

  • Azərbaycan bəstəkarlıq məktəbinin yaradıcısı, məşhur sovet bəstəkarı Üzeyir Hacıbəyovun musiqisi xalqımızın

    ürəyində yaşayır, onun mə'nəvi həyatını zinətləndirir. Zaman bu böyük iste'dadın qurduğu əzəmətli

    binanı sarsıtmaqdan nəinki acizdir, əksinə, onun getdikcə daha da möhkəmləndiyinə şahid olur.

     

    Qara Qarayev

  • Üzeyir məni özünə xas təmkinlə, çox mehriban bir münasibətlə qarşıladı.

    O gündən başlayaraq, ömrünün axırına qədər ölməz sənətkarın hərarətli münasibətini duydum.

    İlk dəfə şəxsiyyətində hiss etdiyim bu hərarəti get-gedə sənətində də duydum və bütün varlığımla ona bağlandım...

     

    Fikrət Əmirov

    19 iyun 2025-ci il

     Ü.Hacıbəyli adına BMA-nın “Şifahi ənənəli Azərbaycan professional musiqisi və onun yeni istiqamətlərinin tədqiqi: Orqanologiya və akustika“ elmi tədqiqat laboratoriyasında 19 iyun 2025-ci il tarixində kiçik elmi-işçi  

    Sevda İsayevanın   “Tarixdə və bu gün qəzəlxanlıq. Bakı folkloru” mövzusunda  seminarı keçirilmişdir.

    Məruzəçi çıxışının əvvəlində qəzəlin yaranma tarixi, qəzəl janrının əsasını təşkil edən əruz vəzni haqqında məlumat verdikdən sonra, xalq artisti Şövkət Ələkbərovanın və digər sənətkarların ifasında görkəmli bəstəkar C.Cahangirovun “Fizuli Kantatası”ndan fraqmentlər səsləndirdi.

    Daha sonra Sevda İsayeva qəzəlxanlığın tarixindən bəhs edərək qeyd etdi ki, qəzəlxanlıq sənətinin kökləri XIII-XIV əsrlərdəki sufi məclisləri ilə sıx bağlıdır.  Məruzəçi müxtəlif əsrlərdə yaşayıb yaratmış  qəzəlxanlar haqqında geniş məlumat verdi.

     Bakı folkloruna keçid edən məruzəçi, Bakıda doğulan qəzəlxan və xanəndələrdən Əliağa Vahid, Hacıbaba Hüseynov, Nəriman Əliyev, Hacı Mail, Əlibaba Məmmədov, Tələt Qasımov, Hacı Ələmdar Mahir, Ağaxan Abdullayev və s. haqqında ətraflı məlumat verərək, onların ifasında məşhur  muğamları səsləndirdi.   

    Qəzəlin müasir ifasında, muğamla qəzəl əlaqəsini birləşdirərək bu sənət formasına yeni nəfəs gətirən xalq artisti Alim Qasımovun  2016-cı ildə  UNESCO-nun Qeyri-Maddi Mədəni İrs Siyahısına daxil edilməsi, qəzəlin və muğamın dünya miqyasında tanınmasına təsir etmişdir.

    Muğamın böyük himayədarı,  Azərbaycan Respublikasının Birinci vitse-prezidenti Mehriban xanım Əliyevanın fədakar fəaliyyəti, milli dəyərlərimizə sonsuz sevgi və qayğısı bu mədəniyyət incimizi dünyaya tanıtdı və Azərbaycan muğamını UNESCO-nun bəşəriyyətin qeyri-maddi mədəni irsi siyahısına daxil etdi.

    Seminarın sonunda BMA-nın elmi-tədqiqat laboratoriyasının müdiri, sənətşünaslıq üzrə fəlsəfə doktoru, dosent Nuridə İsmayılzadə məruzəçiyə tövsiyə və məsləhətlərini verib, uğurlar arzuladı. Sənətşünaslıq üzrə fəlsəfə doktoru, əməkdar incəsənət xadimi, professor Arif Əsədullayev məşhur qəzəlxanlar və xanəndələr haqqında maraqlı xatirələrini danışdı. Seminar iştirakçıları məruzəçini təbrik edib ona uğurlar arzuladılar.

    Elmi-tədqiqat laboratoriyasının

    elmi işçisi, doktorant

    Nazlı Mustafayeva

    Back to Top