2025-ci il noyabrın 14-də Astanada, Küləş Bayseyitova adına Qazaxıstan Milli İncəsənət Universitetində görkəmli qazax bəstəkarı,  Dövlət Mükafatı laureatı Balnur Kıdırbekin 70 illik yubileyinə həsr olunmuş “Musiqi dünyaları:

bəstəkar və epoxa” adlı I Beynəlxalq elmi-praktiki konfransda Ü.Hacıbəyli adına Bakı Musiqi Akademiyasının professoru Zümrüd Axundova-Dadaşzadə  “Actis testantibus: Üzeyir Hacıbəylinin “Koroğlu” operası “Sovetskaya muzıka” jurnalının  diskursunda” mövzusunda məruzə ilə çıxış edib (onlayn).  Zümrüd xanım  Üzeyir bəyin  bütün müsəlman-türk məkanında musiqili teatrın təşəkkül tapmasında müstəsna rolunu zəngin faktlar əsasında sərgiləyib, “Koroğlu” operasının ideoloji qəliblərdən kənarda tədqiqinin zəruriliyini gündəmə gətirərək   operanın bədii məziyyətlərini və kəşflərini vurğulayıb. Məruzə qazax musiqişünasları tərəfindən maraqla qarşılanaraq, sovet dönəmində yazılan əsərlərin tədqiqində elmi yanaşmanın mühüm olması barədə fikir mübadiləsinə səbəb olub.    Z.Axundova-Dadaşzadə həmçinin Balnur Kıdırbeki çağdaş  türk musiqi dünyasının parlaq təmsilçisi kimi səciyyələndirib, onun yaradıcılığının ümdə keyfiyyətlərini dilə gətirib, çoxjanrlı yaradıcılığının tacı “Rekviyem” əsərinin  müxtəlif ənənələri bir araya gətirən konsepsiyasının və məxsusi  bədii təcəssümünün humanist  mahiyyətini açıqlayıb. Sonda o, Azərbaycanın böyük dostu,“Üzeyir Hacıbəyli – türk akademik musiqisinin atası”, “Xocalı qurbanı” simfonik əsərlərinin müəllifi Balnur xanımı səmimi qəlbdən  yubileyi münasibətilə təbrik edib, ona yeni sənət zirvələri  diləyib.