18 mart 2026-cı il tarixində Bakı Musiqi Akademiyasında “İfaçılıq” fakültəsi “Simli alətlər” kafedrasının tələbələrinin iştirakı ilə növbəti konsert proqramı uğurla baş tutdu. 

Konsert proqramı klassik musiqinin seçkin nümunələri ilə zəngin oldu. Gecə Fritz Kreislerin “Qaraçı qız” əsəri ilə başlayaraq, Henryk Wieniawskinin variasiyaları, Henri Vieuxtempsun “Tarantella”sı, Pyotr Ilyich Tchaikovskynin “Yevgeni Onegin” operasından Lenskinin ariyası, Niccolò Paganininin məşhur “Campanella”sı, Erich Wolfgang Korngoldun “Serenada”sı, Pablo de Sarasatenin “Qaraçı təranələri” və Karl Jenkinsin “Palladio” əsəri ilə davam etdi.

Konsertdə gənc ifaçılar öz peşəkarlıqları və səhnə mədəniyyətləri ilə seçilərək klassik musiqinin incə çalarlarını tamaşaçılara təqdim etdilər. Solo çıxışlarla yanaşı, kamera ansamblları və kvartet ifaları dinləyicilər tərəfindən böyük maraq və alqışla qarşılandı.

 Xüsusilə “Detaşe-Sabah” violinoçular ansamblının çıxışı konsertə xüsusi rəng qatdı və proqramın yadda qalan hissələrindən biri oldu.