Tədbiri sənətşünaslıq üzrə fəlsəfə doktoru, Üzeyir Hacıbəyli adına Bakı Musiqi Akademiyasının baş müəllimi Alyona İnyakina açmışdır. O, Raxmaninovun şəxsiyyətinin və yaradıcılıq fəaliyyətinin dünya musiqi sənətinin inkişaf tarixi kontekstində əhəmiyyətindən, eləcə də bu görkəmli sənətkarın musiqisinə Azərbaycan ifaçıları tərəfindən göstərilən sönməz maraqdan bəhs etmişdir.

Konsert proqramı beynəlxalq və respublika müsabiqələri laureatlarının: BMA-nın məzunu, vokal ifaçısı Kənan Rəhmanzadə (Azərbaycan Respublikasının Əməkdar artisti, sənətşünaslıq üzrə fəlsəfə doktoru, BMA-nın baş müəllimi İlham Nazarovun sinfi) və BMA-nın II kurs tələbəsi, pianoçu Əli Hüseynli (SSRİ və Azərbaycan Respublikasının Xalq artisti, professor, BMA-nın rektoru Fərhad Bədəlbəylinin sinfi) ifasında təqdim olunmuşdur. Musiqi axşamı zamanı Raxmaninovun məşhur vokal və fortepiano əsərləri — romanslar, etüd-lövhələr, həmçinin “Aleko” operasından bir fraqment səsləndirilmişdir. Hər bir əsərin ifasından əvvəl onun xarakterini və məzmununu açıqlayan qısa ön söz təqdim olunmuşdur; bu təqdimat Azərbaycan Respublikasının Əməkdar artisti İlham Nazarov tərəfindən həyata keçirilmişdir.