20 noyabr 2026-cı il
Musiqi sevərlər üçün yaddaqalan bir sənət axşami!
20 noyabr 2026-cı il tarixində Bəstəkarlar İttifaqında tanınmış bəstəkar, Əməkdar müəllim, sənətşünaslıq üzrə fəlsəfə doktoru, Bakı Musiqi Akademiyasının professoru Lalə Cəfərovanın yubileyinə həsr olunmuş müəllif konserti böyük sənət coşqusu ilə baş tutdu.
Azərbaycan Bəstəkarlar İttifaqının təşkilatçılığı ilə keçirilən konsert musiqi sənətimizin zənginliyini, bəstəkar yaradıcılığının rəngarəngliyini və ifaçılıq sənətinin yüksək səviyyəsini bir daha nümayiş etdirdi.
Tədbirin açılışında Azərbaycan Bəstəkarlar İttifaqının sədri, AMEA-nın müxbir üzvü, Xalq artisti, professor Firəngiz Əlizadə çıxış edərək yubilyarı təbrik etdi. Daha sonra Əməkdar müəllim, professor Könül Nəsirova və sənətşünaslıq üzrə elmlər doktoru, dosent Leyla Zöhrabova bəstəkarın yaradıcılığı haqqında fikirlərini bölüşdülər.
Konsert proqramında Lalə Cəfərovanın musiqi dünyasının müxtəlif çalarlarını əks etdirən əsərlər səsləndirildi. “Bir Xəzər əfsanəsi” baletindən “Lirik rəqs”, “Adajio” və “Rəqs”, Üzeyir Hacıbəylinin “O olmasın, bu olsun” musiqili komediyasının mövzuları əsasında yazılmış “Fantaziya”, valtorna və piano üçün “Payız nəğməsi”, “Xatirə poeması” və “Darıxıram” romansı dinləyicilərə unudulmaz musiqi anları yaşatdı.
Əməkdar artist İlham Nəzərov, eləcə də Züleyxa Bayramzadə, Aygün Baratzadə, Afət Süleymanova, Solmaz Əliyeva, Murad Həsənzadə, Ayşə Məmmədova, Zeynəbxanım Hüseynzadə, Cavidan Rəsulov, Aysu Abbasova və Ayşə Fətəliyevanın ifaları konsertə xüsusi rəng qatdı.
Gecənin finalında “Bir Xəzər əfsanəsi” baletinin final (Vida) səhnəsi videoyazı şəklində təqdim olundu.
Bu konsert yalnız bir yubiley tədbiri deyil, həm də Azərbaycan bəstəkarlıq məktəbinin yaradıcılıq ənənələrinə, milli musiqi irsimizə və sənətə həsr olunmuş ömrə ehtiramın ifadəsi idi.
Hörmətli Lalə Cəfərovanı yubileyi münasibətilə ürəkdən təbrik edir, ona möhkəm cansağlığı, uzun ömür, yeni yaradıcılıq uğurları və musiqi dolu illər arzulayırıq!



