5 noyabr 2026-cı il tarixində Üzeyir Hacıbəyli adına Bakı Musiqi Akademiyasının Fortepiano fakültəsində keçirilmiş monitorinqin nəticələrinin müzakirəsinə həsr olunmuş iclas keçirilib.

İclasda Akademiyanın Tədris işləri üzrə prorektoru Nərminə Quliyeva, Fortepiano fakültəsinin dekanı Nəzakət Rimazi, Konsertmeyster ustalığı kafedrasının müdiri Gülnarə Acalova, İxtisas fortepiano kafedrasının müdiri Samirə Aşumova, Fortepiano, orqan və klavesin kafedrasının müdiri Afaq Rüstəmova, Metodika və xüsusi pedaqoji hazırlıq kafedrasının müdiri Elnarə Məmmədova iştirak ediblər.

Görüş zamanı kafedra müdirləri monitorinq çərçivəsində aparılmış yoxlamaların nəticələri və əldə olunmuş məlumatlar barədə ətraflı məlumat veriblər. Müzakirələrdə tədris prosesinin təşkili və keyfiyyəti, dərslərin keçirilmə vəziyyəti, professor-müəllim heyətinin və tələbələrin davamiyyəti kimi mühüm məsələlər diqqət mərkəzində olub.

İclasda monitorinq nəticələrinin təhlili əsasında mövcud vəziyyət qiymətləndirilib, tədrisin keyfiyyətinin yüksəldilməsi, tədris intizamının gücləndirilməsi və aşkar olunmuş nöqsanların aradan qaldırılması istiqamətində müvafiq fikir və təkliflər səsləndirilib.