28 noyabr tarixində Bakı Musiqi Akademiyasında keçirilən növbəti ustad dərslər tələbələrin ifa mədəniyyətinin inkişafında mühüm mərhələlərdən biri kimi yadda qaldı.

“Dostluq Körpüsü” layihəsi çərçivəsində BMA-na təşrif buyurmuş İtaliyanın Salerno şəhərində fəaliyyət göstərən Giuseppe Martucci Musiqi Konservatoriyasının musiqiçiləri Akademiyanın tələbələri ilə birbaşa ünsiyyəti, onların ifasını dinləməsi, hər bir frazanın üzərində canlı işləməsi –  yüksək səviyyəli professional toxunuş idi.

 Qeyd edək ki, tədbirin təşkilatçısı Xalq artisti, BMA-nın Beynəlxalq əlaqələr və sosial məsələlər üzrə prorektoru, professor Yeganə Axundova ön sözlə çıxış edib, qonaqları hər kəsə təqdim etdi.

 Bu ustad dərslərinin əsas qonaqları – Giuseppe Martucci adına Musiqi Konservatoriyasının pianoçu, professorları Raffaele Maisano, Raffaele Battiloronun;  həmçinin violin ifaçısı, professor Gennaro Cardaropolinin ustad dərsi – tələbələrin sənətə yanaşmasını daha incə, daha detala hesablanmış bir yanaşmaya yönəltdilər. Onların hər biri müxtəlif Avropa məktəblərinin estetik standartlarını da özü ilə gətirmişdi və bu müxtəliflik tələbələrin düşüncə çevikliyinə güclü təsir bağışladı.

 Proqramda tələbələr klassik musiqi incilərinin mürəkkəb, texniki və melodiya baxımından tələbkar olan nümunələrini səsləndirdilər. Bu repertuar seçimi gənc ifaçıların potensialının yüksək olduğunu göstərməklə yanaşı, onların böyük səhnə perspektivləri haqqında da fikir formalaşdırdı.

 Ustad dərsinin ən dəyərli cəhətlərindən biri də müzakirə mədəniyyəti idi: tələbələr öz ifalarından sonra suallar verdilər, müşahidələrini paylaşdılar və qonaq musiqiçilərin hər bir detalı incəliklə analiz etməsi ilə həm nəzəri, həm praktiki baxımdan yeni biliklər qazandılar.